Byinshi kuri Nyamufata, ‘ancien combattant’ wabaye inyeshyamba mbere yo kwifatanya na FPR

3

  • Yabanje kuba inyeshyamba mbere yo kwinjira muri FPR Inkotanyi
  • Akiri inyeshyamba baje gufata Kigali, bashwanira radiyo Rwanda
  • -Yishe Umufaransa amwambura umudari
  • -Yifashishwa muri filime zivuga amateka y’u Rwanda

Nyamufata Salvator wiyita Kanyenzi atuye mu murenge wa Jabana mu karere ka Gasabo. Ni umusaza wirabura, muremure, imvi zabaye uruyenzi haba ku mutwe no mu bwanwa bwe.

Avuga ko yavuzetse mu 1920 bisobanuye ko afite imyaka 97 gusa ntiwapfa kubyemera ugeranije n’imbaraga afite, arizihirwa cyane, ntiyabasha kwicara yumvise umurishyo w’ingoma.

Imyaka ye iyo uyishidikanyaho abikwemeza, akubwira ko mu 1959 ubwo Abatutsi batangiraga guhunga yari umugabo w’igikwerere wari ubyaye kane.

N’ubwo Nyamufata ari umusaza ukuze, agerageza kwifata nk’ukiri muto.Ubwo twahuraga yari yambaye ipantalo yo mu bwoko bwa coton yayitebeje mu nkweto zizamuye (boot) ishati y’umutuku y’amaboko maremare, ijire ifite amabara ya gisirikare, mu ijosi yari yambaye umusaraba munini, umudari w’abasirikare bo kwa Habyarimana, wanditseho MK bivuga amazina y’ababyeyi be, n’urunigi rw’amabara y’ubururu n’umutuku.

Ku rukenyerero mu ruhande rw’iburyo yari yiziritse agakapu gato k’ibara rya gisirikare karimo igikombe n’isahane byifashishwa n’abasirikare bari ku rugamba nawe aba yashyizemo impamba, Iyo icyaka kimufashe arapfundura agasoma ku kagwa kaba karimo, naho mu ntoki ze akaba afite icumu ryanditseho FPR ndetse n’amabara aranga iri shyaka ari yo Umutuku, umukara ubururu bw’ijuru n’umweru.

Ni umusaza ugikomeye

Nyamufata Salvator avuga ko uko agaragara cyane cyane mu myambarire ye bifite ibisobanuro bikomeye kuri we nk’uko yabidutangarije mu kiganiro twagiranye.

Nyamufata yatangiye kurwana urugamba rwo kubohoza u Rwanda 1963

Nk’uko biri mu mateka y’u Rwanda, mu 1959 abari mu bwoko bw’Abatutsi bamwe barishwe, abandi baratwikirwa, abandi bahungira mu bihugu bitandukanye bikikije u Rwanda.

1959 Salvator yari afite imyaka 39 afite abana bane, yahunganye n’abandi bajya mu gihugu cy’u Burundi. Bagezeyo ngo barisuganije hamwe n’abandi bari barahungiye muri Uganda na Congo bashaka gutera u Rwanda ngo barubohoze bagaruke kuba mu gihugu cyababyaye, maze mu 1963 biyemeza gutera.

Icyo gihe batera ngo bageze i Kanombe ariko ntibabashije gutsinda kuko abari babayoboye ari bo Kayitare na Ngurumbe bananiwe kumvikana kuko buri wese yashakaga kujya mu gitero cyijya gufata radiyo, ngo ahite avuga ko ari we Perezida, ibintu yita inda nini.

Yagize ati “Kayitare yari ku kibuga cy’Indege, Ngurumbe akaba kuri radiyo. Twari dufite iminsi kugira ngo tuzatere. Burya igifu ni kibi Kayitare yararebye ati Ngurumbe nafata aravuga ko ari we perezida najye aha ku kibuga cy’indege biraba bivuze iki? Arahindura yohereza umwana we Nyarutsi ati irukanka ubwire Ngurumbe duhindure aze hano nange njye kuri radiyo. Twahise ducika impehe tuba ingabo zitagira umutware umwe aca aha undi aca aha.”

Mu 1985 nibwo Nyamufata yongeye gusubira mu gisirikare muri Uganda, aho yari mu bafashije perezida Museveni kujya ku butegetsi, nyuma mu 1990 afatanya n’abandi banyarwanda mu rugamba rwo kubohora igihugu no guhagarika Jenoside yakorewe Abatutsi aza gusezerwa mu 1997 afite ipeti rya Staff Sergent n’ubwo atahise ataha ahubwo yahise ajya gukora mu ishuri rya gisirikare ryari riri muri Camp Kigali.

Yishe umusirakare w’umufaransa amwambura umudari

Nyamufata avuga ko ubwo bari mu rugamba rwo kubohora igihugu, bageze ahazwi nko kuri Base ho mu karere ka Gakenke mu ntara y’Amajyaruguru, arasa umuzungu w’umufaransa wari umukomando ahita amwambura umudari yari yarambitswe na Habyarimana arawambara kugeza n’ubu akiwambaye.

Umudari yambuye umusirikare w’Umufaransa amaze kumwica

Iyo umubajije impamvu yambara ibirango bitagikoreshwa na leta y’u Rwanda, Nyamufata agira ati “ uyu mudari wanga Inkotanyi ariko Inkotanyi ntizanga uyu mudari. Inkotanyi ni iy’amahoro ntishaka amaraso, ntishaka urwango, ishaka amahoro ubumwe n’umutekano mu Rwanda.”

Nyamufata ati “Igisirikare ukivamo ntikikuvamo”

Nk’uko twabigarutseho haruguru, Nyamufata Salvator yitwara gisirikare ukurikije imyambarire ye uhereye ku rukweto, ijiri ya gisirikare, ndetse n’agakapu aba yaziritse ku rucyenyerero rwe.

Iyo umubajije impamvu yambara nk’abasirikare kandi yarasezerewe, asubiza ko umuntu wese wigeze kuba umusirikare arinda apfa akiri umusirikare ku mutima n’ubwo yaba ari umusaza ugendera ku kibando.

Yagize ati “ reka ngusubize, ukivamo ntikuvamo.”

Nyamufata avuga ko nta rindi shyaka ashobora kuyoboka ritari FPR yabayemo kuva ryashingwa ndetse akarirwanira, akaba ari nayo mpamvu ahorana icumu ryanditseho FPR ndetse n’amabara yaryo.

Nyamufata yifashishijwe muri Filime zisobanura amateka y’u Rwanda

Nyamufata Salvator avuga ko yagaragaye muri filime ivuga ku mateka y’u Rwanda yiswe “Ruganzu n‘ibisumizi’, aho yagaragaye akina nka Ruganzu Ndoli wari umwami w’u Rwanda wabohoje ibice bitandukanye byari bigize u Rwanda nyuma y’uko rwigaruriwe n’abanyamahanga.

Igice cya mbere cy’iyi filime cyarasohotse ndetse n’icya kabiri ngo kizasohoka mu kwezi kwa gatandatu.

Ikarita yo gusezererwa mu ngabo kwa Nyamufata

Bimwe mu bikoresho yifashisha anywa amazi ni ibya gisirikare

Yisangize Inshuti.

Ibitekerezo 3

  1. Gasombe uzakurikire amateka burya bavuga ko rukara rwa bishingwe yishe umuzungu ariko ubundi yishwe numugaragu ariko byitirirwa shebuja. Niko byagendaga ntiwatabarana numutware ngo uze wivuga imyato kdi hari uwari uyobiye.hhhh

Tanga Igitekerezo