Ikiganiro na Gasimba Francois, wanditse byinshi kuri politiki y’u Rwanda nyuma bikaba

3

Gasimba Francois Xavier Munezero, ni umwanditsi nyarwanda bamwe bafata nk’umuhanuzi, wamenyekanye cyane mu kwandika ibitabo bivuga kuri politiki y’u Rwanda nk’Isiha Rusahuzi, Bangaheza ndetse n’Indege y’Ubumwe.

- Yanditse igitabo, gisohoka ari uko uwari Perezida Habyarimana Juvenal abyemeye

- Yanditse ku byo Leon Mugesera ashobora gukora, bibaho

- Yanditse ku mpinduka zagombaga kuba muri Guverinoma y’Ubumwe, nyuma y’umwaka biraba.

- Afite inzozi zo kugira Ikinyarwanda ururimi mpuzamahanga

Uyu musaza w’imyaka 57, wirabura, ufite imvi zatangiye kuba uruyenzi, MAKURUKI yamusanze mu biro bye muri Kaminuza y’u Rwanda ishami ry’uburezi i Kigali, maze tuganira birambuye.

Makuruki:Mwatangiye kwandika ibitabo ryari?

Gasimba:Ibitabo nabitangiye muri 1982, ariko igitabo wenda n’abantu bakunda kuvuga ko ari cyo cya mbere ni ‘Isiha Rusahuzi’ nanditse muri 1987.

Makuruki:Ujya kwandika Isiha rusahuzi igitekerezo cyavuye he?

Gasimba:Kiriya gitabo, wenda nyuma y’imyaka 30 ni bwo umuntu abona ko byari ngombwa kucyandika mu kurwanya ubukogosi na ruswa. Nabonaga icyo gihe kugirango ushobore kubaho ari uko wicecekera, abantu bonona umutungo w’igihugu, bitwara nabi…abantu twaraganiraga bakavuga ngo natwe turabibona ariko ntacyo twakora, njye nk’umwanditsi nkavuga nti ntacyo twakora koko? Impyisi iyo uyivugirije induru, n’iyo utayishe ntubura kuyitesha intama.

Makuruki:Ubwo se nta ngaruka wumvaga byakugiraho?

Gasimba:Kubererekera ubwoba ni ikintu kibi mu bwanditsi. Ubwoba narabugize, ngomba no kwandikira Perezida wa Repubulika ibaruwa yandikishije intoki kugira ngo musabe uburenganzira bwo gutangaza iriya nyandiko, ni we watanze uburenganzira ko gitangazwa…numvise ko ngo bakimusomeye.

Makuruki:Abandi bayobozi se bo ntabwo bakwamaganye?

Gasimba: Ntabwo uzi ukuntu banyamaganye mu itangazamakuru! Bavuga ko ndi inyangarwanda. Barantumiye kuri radiyo ngo nisobanure, wumva ahari hari ibyaha nari nakoze.

Makuruki:Ngo wanahanuriye Mugesera ariko?

Gasimba:Muri za 1991 nanditse ikindi kitwa ‘Bangaheza’, na bwo itangazamakuru riranyamagana. Nahimbye ikimasa, ko Habyarimana yahaye abantu ikimasa ngo bamufashe kurwana intambara no kuvugurura MRND ye, noneho umuntu batumye gushaka icyo kimasa ni Mugesera Leon, baragenda bararirimba nk’abashumbaaaa, noneho kiraza muri Nyabugogo kirakirwa, kugeza ubwo bakibaze inyama bakaza kuziteka ku Kimihurura. Nari namwambitse imyenda myiza muha n’ishoka agiye gutema ijosi ry’icyo kimasa, kandi icyo kimasa cyashushanyaga u Rwanda. Hashize umwaka ajya i Kabaya avuga ko bagomba gutema abantu amajosi.

Gasimba Francois Xavier Munezero mu biro bye muri Kamuniza y'u Rwanda ishami ry'uburezi

Makuruki:Mu 1999 wanditse igitabo "Indege y’ubumwe", washakaga kuvuga iki?

Gasimba:Urabona u Rwanda rwari rugifite ibikomere bikivirirana, kubera ko ubumwe bwabuze. Noneho nkavuga nti ariko abantu ko bavuga ubumwe, uko baririmba ubumwe, ni nako babwitayeho, bashaka kuburinda bakabwubaka ngo abantu babe bamwe, nureba umuntu ubone ko ari umuntu nkawe? Nabishyize mu rwego rwa politiki kuko nabonaga ari byo bibereyemo. Abagisomye bambwiye ko harimo ubuhanuzi pe!

(Nyuma y’umwaka yanditse icyo gitabo, uwari Perezida Bizimungu Pasteur yareguye, nyuma y’iminsi mike uwari Minisitiri w’Intebe Pierre Celestin Rwigema na we arahunga).

Makuruki: Wanahanuriye ishyaka MDR?

Gasimba:Naravugaga nti kuki mucitsemo ibice bibiri, niba mwarahagurutse ngo murwanye MRND, kuki mujya kwigana CDR? Ndetse nasabye na Uwiringiyimana Agathe ngo ntiyemere kuba Minisitiri w’Intebe kuko nabonaga ari ibintu bari kumushukisha. Nari umujyanama we ariko nahise negura kuko nabonaga aho ishyaka rigana atari heza.

Makuruki:Umuntu akurikije ibyo wandika, yavuga ko nawe uri umunyapolitiki ?

Gasimba:Abamfata nk’umunyapolitiki baba bamfashe nabi kuko sinigeze mparanira inyungu zanjye bwite, nta n’ubwo naharaniye ubuyobozi, igihe udaharanira ubuyobozi ntabwo uba uri umunyapolitiki, baba bakubeshyeye.

Makuruki:Ubwanditsi mu Rwanda ubona ari akazi kabyarira umuntu amaramuko?

Gasimba:Ushaka amaramuko wajya kuba intore, ariko nashishikariza abantu guhanga bakurikije kami yabo.

Makuruki:Ni izihe nzitizi ubona zikibase ubwanditsi nyarwanda?

Gasimba:Nta murage w’ubuhanzi dufite kandi wacikijwe n’umwaduko w’abazungu. Amashuri yose n’amadini byabaye ibyo gucecekesha ibyari bisanzweho. Abanditsi bari guhinduka intore, barata ubutegetsi. Nta mikoro, abantu barakennye, nta muco wo gusoma uhari, gusuzugura Ikinyarwanda…

Gasimba Francois wigisha Ikinyarwanda muri Kaminuza y’u Rwanda, Ishami ry’Uburezi, avuga ko agiye gushinga amatsinda y’Ikinyarwanda ku isi hose, aho abashaka kumenya Ikinyarwanda, umuco n’ibindi byerekeranye bazajya babibona, ku buryo ururimi rw’Ikinyarwanda ruzagera aho rukaba mpuzamahanga.

Yahawe ibihembo inshuro enye n’Umuryango w’ibihugu bivuga Igifaransa (OIF), kubera guteza imbere ururimi gakondao abinyujije mu bwanditsi.

Yisangize Inshuti.

Ibitekerezo 3

  1. Uyu musaza nu Muhanga rwose, ati ushaka amaramuko ajya kuba Intore!!!! Mundangire aho nakura ibyo bitabo bya kera nzisomere!

  2. Ni byiza kuba mwatuzaniye uwo mwanditsi mukuru turamukunda ni umuhanga. Ariko ndibaza impamvu mutagize amatsiko ku bitabo bishya yanditse vuba aha mukaba mwagumye ku bya kera! Mwatubariza contacts ze aho ibitabo yanditse umuntu yabibariza kuko twarabibuze
    DAMASCENE

  3. Uwo musaza ni umuhanga.

    mumpe e-mail ye nzamusabe amfashe kwandika igitabo igitabo nise "Singukomeretse yutava twembi" Mushobora kumpuza nawe se?
    Murakoze.

Tanga Igitekerezo