Byemejwe ko umwami Kigeli V atabarizwa mu Rwanda

Abagize umuryango w’Umwami Kigeli V Ndahindurwa kuri uyu wa Kane bemeje ko umugogo we ugomba gutabarizwa mu Rwanda.

Kigeli yatanze tariki ya 16 Ukwakira, atangira muri Leta ya Virginia muri Leta Zunze Ubumwe za Amerika aho yari amaze imyaka isaga 20 ari mu buhungiro nyuma y’indi myaka isaga 30 yamaze mu bihugu bya Afurika nyuma yo kwirukanawa mu gihugu n’Ababiligi mu mwaka wa 1961.

Aho azatabarizwa hari hakomeje kuba urujijo dore ko ababanaga na we muri Amerika bifuzaga ko ari na ho atabarizwa na ho abo mu muryango we baba mu Rwanda bakifuza ko atabarizwa mu Rwanda.

Mu cyumweru gishize ni bwo itsinda riyobowe na Pasiteri Ezra Mpyisi ryahagurutse mu Rwanda rigiye guhura n’ababanaga n’Umwami Kigeli, V ngo higwe ku ho azatabarizwa.

Ku mugoroba wo kuri uyu Kane ni bwo hasotse itangazo ryasinyweho na Speciosa Mukabayojo, mushiki w’Umwami Kigeli V na Christine Mukabayojo, Kigeli abereye se wabo rivuga ko azatabarizwa mu Rwanda i Mwima na Mushirarungu hafi ya mukuru we Mutara III Rudahigwa watanze mu 1959.

Itangazo rigira riti "Umuryango w’Umwami Kigeli V Ndahindurwa Jean Baptiste uramenyesha abanyarwanda bose, incuti n’abavandimwe ko umugogo w’umwami uzatabarizwa mu gihugu cyamubyaye, i Mwima ya Nyanza, aho yimikiwe, aherekejwe n’abanyarwanda yakunze ubuzima bwe bwose. Itariki n’imihango byo kumusezeraho bwa nyuma mukazayimenyeshwa mu minsi iri imbere."

Iri tangazo rivuze ibi mu gihe umujyanama w’Umwami Boniface Benzinge aherutse gutangariza Radiyo Ijwi ry’Amerika ko umwami yifuje ko atashyingurwa mu Rwanda.

Kigeli yatanze afite imyaka 80.Yavutse mu 1935 kuri Yuhi V Musinga na Mukashema Bernadette, avukira mu Burengerazuba bw’u Rwanda i Rusizi (Cyangugu).

Yize ubukarani mu ishuri ry’Indatwa (ubu ni G.S Butare) ndetse aza no gukora akazi k’ubukarani i Butare mbere yo kuba umwami.

Tariki 28 Nyakanga 1959 ku musozi wa Mwima ni bwo umwiru Kayumba yatangaje ko umwami w’u Rwanda ari Kigeli Ndahindurwa nyuma y’itanga ritunguranye rya Mutara III Rudahigwa. Rudahigwa yari atanze nta mwana afite.

Tariki 9 Ukwakira 1959, Kigeli V yarahiriye imbere ya guverineri wa Ruanda-Urundi, Harroy arahirira ko abaye umwami uganje (ugendera ku Itegeko Nshinga).Yaje kubuzwa kugaruka mu gihugu mur 1961 ubwo yari yagiye muri Zaire (RDC) kubonana n’umukuru wa LONI.

Yisangize Inshuti.

Ibitekerezo

Tanga Igitekerezo