Perezida Salva Kiir na Visi Perezida we bahawe gasopo mu nama ya AU

1

Perezida wa Sudani y’epfo Salva Kiir ndetse na Visi Perezida we Dr Riek Machar, bihanangirijwe bikomeye n’abari bateraniye mu nama y’umuryango wa Afurika yunze ubumwe hano I Kigali, bababwira ko bagomba kubahiriza ibyo biyemeje ubwo basinyaga amasezerano y’amahoro.

Mu gihugu cya Sudani y’epfo hamaze iminsi mike hadutse imirwano hagati y’ingabo zo ku ruhande rwa Perezida Salva Kiir ndetse n’abo ku ruhande rwa Visi Perezida Riek Machar, imirwano imaze kugwamo abaturage bagera muri 300 n’abandi benshi bakaba bamaze guhunga.

Iyi mirwano yadutse nyuma y’amezi make aba bayobozi bombi bashyize umukono ku masezerano y’amahoro agamije guhagarika imirwano, amasezerano yaje gutuma Riek Machar asubizwa mu mwanya we wa Visi Perezida, umwanya yakuwemo muri 2013 nyuma yo gushinjwa gushaka guhirika ubutegetsi bwa Salva Kiir.

Ubwo yafunguraga ku mugaragaro inama ya 27 y’umuryango wa Afurika yunze ubumwe iri kubera mu Rwanda, Perezida Idriss Deby unawuyobora, yavuze ko uyu mugabane ntacyo wageraho ndetse ngo nta n’aho wagera mu gihe Abanyafrica ubwabo batikemuriye ibibazo byabo ku giti cyabo nta wundi bahanze amaso.

Perezida Deby avuga ko ibiri kubera muri Sudan y’Epfo byerekana ko inzira ikiri ndende kuri uyu mugabane bityo ngo nk’umuryango wa Afurika yunze ubumwe ukaba usabwa byinshi byo gukora kugira ngo ibibazo cyane cyane iby’umutekano muke biwugarije bibashe kubonerwa umuti.

Yagize ati “Nubwo ubu muri Juba hasa n’ahagarutse agahenge, ariko ibintu biracyateye ubwoba, ibi bishobora kuba hose ku mugabane wacu, urebye muri Sudani y’epfo hari abantu 300 bamaze gupfa ndetse n’ibihumbi bimaze guhunga mu masaha make, harasabwa imbaraga zishoboka kugira ngo amahoro agaruke muri iki gihugu. Ndibutsa Perezida Salva Kiir n’uwo bahanganye Riek Machar ko ari bo bakwiye gukemura ibi bibazo byabo byashyize mu baturage.”

Yakomeje agira ati: “Icya kabiri ndasaba aba bombi gushyira mu bikorwa ibyo bashyizeho umukono mu mwaka wa 2015 i Addis Ababa.”

Avuga ko ibibazo biri muri Sudani y’epfo bijya gusa n’ibibera mu Burundi, muri Somalia n’ahandi bityo ngo bikaba bikeneye imbaraga z’abanyafurika mu kubikemura n’ubwo ngo hari aho binareba Umuryango mpuzamahanga.

Buri ruhande muri Sudani y’epfo (urwa Perezida Kiir n’urwa Machr) rushinja rugenzi rwarwo kuba ari rwo ruteza imvururu ndetse rukaba ari rwo rwatangije iyi miwano.

Yisangize Inshuti.

Ibitekerezo 1

Tanga Igitekerezo