Ingengabihe y’uko ibiganiro bizakurukirana mu nama ya AU igiye kubera i Kigali

Inzu ya Kigali Convention Center izaberamo inama ya 27 ya AU

Tariki 10-18 Nyakanga 2016 nibwo u Rwanda ruzakira inama ya 27 y’Umuryango wa Afurika yunze Ubumwe izateranira i Kigali.Iyi nama yitezweho gutanga umusaruro mu bihugu bigize uyu muryango aho hazigirwamo byinshi bizagirira akamaro umugabane w’Afurika n’abawutuye muri rusange ari nabyo byatumye hashyirwaho gahunda y’inama zizajya ziba mu gihe cy’iminsi igera ku cyumweru.

Iyi nama izamara icyumweru izigirwamo byinshi bitandukanye hibandwa k’uburenganzira bw’ikiremwa muntu cyane cyane uburenganzira bw’abagore nk’insanganyamatsiko y’iyi nama y’umuryango wa Afurika yunze Ubumwe harimo n’imurikwa rya pasiporo izaba ihuriweho n’ibihugu byose by’umugabane..

Ibiganiro bitandukanye bizabera muri iyi nama ya 27 y’Umuryango wa Afurika yunze Ubumwe biteganyijwe kuba ku matariki akurikira:

Tariki 10-12 Nyakanga 2016: Hateganyijwe inama ya 32 ya komite nyobozi ihoraho (PRC) ari nayo ireba umunsi ku munsi ibikorwa by’ubucuruzi (business) mu bihugu bigize uyu muryango.

Tariki 13-15 Nyakanga 2016: hateganyijwe inama ya 29 ya njyanama ari nayo igena imirimo y’ihuriro. Aha abanyamuryango bose b’uyu muryango bagiramo uruhare kugeza ku rwego rw’abaminisitiri b’ububanyi n’amahanga.

Tariki 16 Nyakanga 2016: hateganyijwe inama y’abayobozi b’ibihugu babarizwa muri NEPAD ndetse n’inama ya guverinoma.

Tariki 17-18 Nyakanga 2016: hazaba inama ya 27 y’abakuru b’ibihugu na guverinoma baturuka mu bihugu bya Afurika yunze ubumwe. Iyi nama igena ingamba za AU ikanazishyiraho, ni nayo kandi igena gahunda z’umwaka ikanagenzura ko ingamba n’imyanzuro byafashwe byashyizwe mu bikorwa.

Kugeza kuri ubu imyiteguro y’iyi nama igeze ku musozo nyuma yaho abayobozi batandukanye bagiye basura u Rwanda bareba aho iyi myiteguro igeze mu basuye u Rwanda harimo perezida wa Komisiyo ya AU, Dr Nkosazana Dlamini Zuma waje mu Rwanda mu minsi ishize akanyurwa n’aho imyiteguro yo kwakira iyi inama igeze.

Dr Dlamini kandi yatemberejwe ahantu hatandukanye harimo amahoteli azacumbikira abazitabira iyi nama ndetse n’inzu ya Kigali Convention Center izaberamo iyi nama, akaba yaranyuzwe n’uburyo imyiteguro imeze.

Muri iyi nama ya Afurika yunze ubumwe(AU) u Rwanda ruteganya kwakira abashyitsi hagati ya 3500 na 4000 n’abakuru b’ibihugu bagera kuri 54.

Yisangize Inshuti.

Ibitekerezo

Tanga Igitekerezo