Ibihuha ku matora y’umusimbura wa Dlamini Zuma byatewe utwatsi

Prof. Vincent Nmehielle yemeje ko amatora y’uzasimbura Zuma azaba nta gisibya

Nyuma y’amakuru yagendaga acicikana avuga ko amatora y’uzasimbura Dr Nkosazana Dlamini Zuma ku mwanya w’umuyobozi wa Komisiyo y’umuryango wa Afurika yunze ubumwe ashobora kutaba, byatewe utwatsi bemeza ko aya matora agomba kuba kuri uyu wa mbere nk’uko biteganyijwe.

Byari byavuzwe ko ibihugu 15 bigize Umuryango w’Ubukungu bw’ibihugu bya Afurika y’u Burengerazuba, ECOWAS, byandikiye Komisiyo y’Umuryango wa Afurika yunze Ubumwe bisaba ko amatora y’Umuyobozi wa Komisiyo y’uwo muryango yasubikwa bitewe n’uko ngo abakandida bose biyamamaje kuri uyu mwanya ngo ba batujuje ibisabwa.

Abakandida batatu bari guhatanira kuyobora Komisiyo ya AU harimo Minisitiri w’Ububanyi n’Amahanga wa Botswana Dr Pelonomi Venson-Moitoi; Dr Specioza Naigaga Wandira Kazibwe wigeze kuba Visi Perezida wa Uganda, na Minisitiri w’Ububanyi n’Amahanga wa Guinea Equatorial, Agapito Mba Mokuy.

Mu rwego rwo gukuraho urujijo ku byari bimaze iminsi bivugwa kuri aya matora, Prof. Vincent Nmehielle, umuyobozi ushinzwe amategeko mu muryango wa Afurika yunze ubumwe, yabwiye abanyamakuru ko nubwo byagiye bivugwa ko aya matora ashobora kutaba, ngo ibyo nta shingiro bifite bitewe n’uko amatora azaba kuri uyu wa mbere.

Yagize ati: “ Hari ibihuha bimaze iminsi biriho ko amatora ntayazabaho, ndashaka kubisobanura neza ko inama rusange yabifasheho umwanzuro muri iki gitondo ko amatora agomba gukomeza nk’uko biteganyijwe kuri gahunda. Amatora azaba ejo ndetse ejo tugomba kurara tumenye abayobozi b’iyi komisiyo.”

Uyu muyobozi yavuze ko abona nta kibazo cyari kuvuka kuri aba bakandida bitewe n’uko ngo nabo babarizwa muri uyu muryango kandi bakaba baratoranyijwe binyuze mu mucyo ndetse ngo bakaba nta n’imiziro cyangwa ibihano bafatiwe ku mpamvu zinyuranye byatuma bavuga ko batujuje ibisabwa.

Komisiyo ya AU ifite abakomiseri batandatu mu munani bari kurangiza manda ya kabiri batemerewe kongera kwiyamamaza.

Ubusanzwe amatora akorwa mu ibanga, aho buri gihugu gitanga ijwi rimwe.
Gutora umuyobozi wa Komisiyo y’Umuryango wa Afurika yunze ubumwe n’umwungirije, bikorwa n’abakuru b’ibihugu na za guverinoma, mu gihe abakomiseri batorwa n’abaminisitiri b’ububanyi n’amahanga.

Kugira ngo umukandida atsinde agomba nibura kuba afite bibiri bya gatatu by’amajwi y’abatoye. Iyo nta n’umwe ubonye ayo majwi, amatora ashobora gusubikwa hagashyirwaho ubuyobozi bw’inzibacyuho.

Dr Dlamini Zuma yari amaze imyaka 4 ayobora iyi komisiyo kuko yatangiye kuyiyobora muri Nyakanga 2012, aho yari abaye umugore wa mbere uyoboye iyi komisiyo.

Yisangize Inshuti.

Ibitekerezo

Tanga Igitekerezo