Dlamini Zuma yasabye abaperezida kugabanya urukundo bakunda ubutegetsi bakongera urwo bakunda abaturage

Umuyobozi wa komisiyo y’umuryango wa Afurika yunze umumwe Dr. Nkosazana Dlamini Zuma

Mu ijambo yagejeje ku baperezida bitabiriye inama ya 27 y’umuryango wa Afurika yunze ubumwe, umuyobozi wa komisiyo ya Afurika yunze umumwe Dr. Nkosazana Dlamini Zuma yagarutse kuri byinshi byatuma Afurika ihinduka muri byose maze asaba abaperezida n’abandi banyepolitiki bitabiriye iyi nama kongera urukundo bakunda abaturage rukaruta urwo bakunda ubutegetsi.

Kuri iki cyumweri tariki ya 17 Nyakanga ni bwo abakuru b’ibihugu n’ababahagarariye bahuriye mu nama y’umuryango wa Afurika yunze ubumwe maze baganira ku cyateza imbere uyu mugabane.

Mu mbwirwaruhame umuyobozi wa komisiyo y’umuryango wa Afurika yunze ubumwe yagejeje ku bakuru b’ibihugu bitabiriye iyi nama, Dr. Dlamini Zuma yavuze ko umugabane wa Afurika ufite amahirwe menshi yatuma itera imbere ariko avuga ko kugirango bigerweho ari uko abayobozi b’ibihugu bya Afurika bakunda urukundo rwinshi abaturage babo kuruta urwo bakunda ubutegetsi.

Dr. Dlamini Zuma yagize ati: "Imbaraga z’urukundo dukunda bagenzi bacu b’abanyafurika niziruta izo dukunda ubutegetsi hazabaho amahoro, Afurika dufite uyu munsi iratanga icyizere turimo kubona icyizere cyo kwiyubaka mu baturage bacu mu kurandura ubukene no guhindura ubukungu bwacu, turimo kubona impinduka zitigeze kubaho mu mijyi yacu, turimo kongera umubare w’abakoresha amashanyarazi, ikoranabuhanga, amazi meza, isuku n’isukura, amashuri yubatse neza n’ibibuga by’imikino"

Yavuze ko Afurika ifite byinshi byayiteza imbere ndetse anatanga ingero za bimwe mu bimaze kugerwaho maze avuga ko Afurika itanga icyizere cyo kugera ku iterambere muri visiyo abaperezida bayo bihaye ya 2063..

Yagize ati: "Dufite icyizere kuko ubuyobozi na politiki y’ubw’ubukungu bw’uyu mugabane bushaka gushyiraho inganda, nimureke abaturage bacu babyaze umusaruro umutungo kamere bafite"

Dr. Zuma yakomeje asaba abateraniye muri iyi nama guha abanyamakuru ubwisanzure no kubareka bakavuga ukuri ndetse no gushyiraho uburinganire hagati y’umugabo n’umugore kandi bagahabwa uburenganzira bungana muri byose.

Ku ngingo yo guteza imbere uburinganire Dr. Zuma yatanze urugero ku gihugu cy’u Rwanda agishimira intambwe cyateye mu guteza imbere uburinganire bw’abagabo n’abagore.

Yagize ati: "Kuri iki ndashimira nyakubahwa Perezida wa Repubulika y’u Rwanda kuko n’abagore bose bo kuri uyu mugabane bamushimiye ko ari Perezida wa mbere ku Isi wubahiriza uburenganzira bw’umugore, bavuga ko bashaka kumushimira kuko babona ko mu Rwanda nta mvugo ikivuga ko nyuma y’insinzi y’abagabo hazaho abagore, ahubwo kuri ubu mu Rwanda bavuga ko umugore n’umugabo bajyana muri byose "

Dr. Zuma yavuze ko umugabane wa Afurika udashobora gutera imbere igihe abaturage bayo bazaba batabigizemo uruhare, yavuze ko Afurika ifite ubukire bityo rero ngo nta mpamvu ikwiye gutuma abaturage bayo bakomeza gukena, yabasabye kandi guharanira kwigira no kwihesha agaciro nk’abanyafurika.

Dlamini kandi zuma yanafunguye k’umugaragaro pasiporo ihuriweho anayishyikiriza Perezida wa Repubulika y’u Rwanda Paul Kagame na Perezida Idriss Deby uyobora Tchad akaba ari na we uyobora umuryango wa Afurika yunze ubumwe.

Dr. Dlamini Zuma asabye abaperezida kugabanya urukundo bakunda ubutegetsi bakongera urwo bakunda abaturage mu gihe hirya no hino muri Afurika hagenda havugwa indambara n’imirwano ishingiye ku kugundira ubutegetsi bigatuma abaturage babihomberamo abandi bagasiga ubuzima muri izo mvururu za politiki.


Perezida Kagame na Idriss Deby babanjirije abandi guhabwa pasiporo ihuriweho n’abanyafurka bose


Aba ni abaperezida bitabiriye inama ya Au bari mu cyumba cy’inama


Iyi nama yitabiriwe n’abaperezida ba Afurika basaga 30

Jean Paul NIYITANGA

MAKURUKI.RW

Yisangize Inshuti.

Ibitekerezo

Tanga Igitekerezo