#AU SUMMIT: EAC iryamiye amajanja ku kibazo cya Sudani y’Epfo

Minisitiri Louise Mushikiwabo avuga ko nibyemezwa ko hakenewe ingabo muri Sudani y’epfo ngo aka karere kazahita kazohereza

Nyuma y’iminsi mike mu gihugu cya Sudani y’epfo hongeye kuvuka imirwano hagati y’ingabo zo ku ruhande rwa Perezida Salva Kiir ndetse n’izo ku ruhande rwa Visi Perezida Riek Machar, kuri ubu ngo ubufasha bwihuse mu gutabara abaturage b’iki gihugu ngo bushobora guturuka mu karere ka Afurika y’iburasirazuba iki gihugu giherereyemo mu gihe bizaba byemejwe.

Minisitiri w’ububanyi n’amahanga w’u Rwanda, Louise Mushikiwabo avuga ko nk’akarere ka Afurika y’iburasirazuba by’umwihariko u Rwanda, ngo bahangayikishijwe n’iki kibazo kiri muri Sudani y’epfo, bityo ngo muri iyi nama ya AU bakaba bazigiramo uburyo iki kibazo cyakemuka mu maguru mashya.

Yagize ati “Ikibazo cya Sudani y’amajyepfo ni ikibazo kidukomereye cyane nk’umugabane wa Afurika cyane cyane nkatwe muri aka karere ka Afurika y’iburasirazuba, Sudani y’amajyepfo ni igihugu gishya muri uyu muryango wacu, twebwe rero biduteye impungenge cyane muri aka karere, cyane ko twebwe nk’u Rwanda dufiteyo ingabo muri Sudani y’amajyepfo zagize ibibazo muri iyi minsi ishize abasirikare batatu b’u Rwanda bakaba barakomeretse muri iyi minsi ishize turabikurikiranira hafi rero.”

Minisitiri Mushikiwabo yavuze ko kugeza ubu aka karere kamaze gutegura umutwe w’ingabo (Brigade) wibumbiye mu mutwe w’ingabo z’akarere ka Afurika y’iburasirazuba zishinzwe gutabara aho rukomeye (East African Standby Force) wo kuba watabara muri iki gihugu mu gihe bizaba byamaze kwemezwa.

Yagize ati: “Iriya Brigade yashyiriweho kugira ngo igihe habaye ibibazo bikomeye mu karere runaka, abasirikare b’ako karere babe babasha kugenda mu buryo bwihuse bakajya gutabara, ni brigade yo gutabara muri aka karere kacu ka Afurika y’iburasirazuba, ndetse tukaba twishimira ko aka karere kacu ari ko ka mbere kabashije kwitegura neza, brigade ikaba iri ku murongo bikaba byarateguwe neza ikaba ishobora gutabara mu gihe cy’iminsi itari myinshi.”

Yavuze ko muri iyi nama y’umuryango wa Afurika yunze ubumwe izaba inakira umunyamabanga mukuru w’umuryango w’abibumbye Ban Ki-Moon, bazaganira kuri iki kibazo n’uburyo iki gihugu cyatabarwa, bityo ngo nibyemezwa ko muri Sudani y’epfo hakenewe ingabo, ngo ingabo zizaba ziturutse mu karere ka Afurika y’iburasirazuba zizahita zoherezwa muri iki gihugu.

Imirwano muri Sudani y’epfo yongeye kuvuka nyuma y’amezi abiri hari hagiyeho ubutegetsi busangiwe n’impande zombi, ubutegetsi bwashyizweho nyuma y’amasezerano y’amahoro no guhagarika imirwano yashyizweho umukono na Perezida Salva Kiir ndetse na Visi Perezida Riek Machar, bari bamaze imyaka isaga itatu barebana ay’ingwe.

Jean Louis UWISHYAKA

MAKURUKI.RW

Yisangize Inshuti.

Ibitekerezo

Tanga Igitekerezo